ಮೊದಲು ತಿಳಿ ತಿಳಿ ಹಾಲು
ಕ್ರಮೇಣ ಕೆನೆ ಕೆನೆ ಮೊಸರು
ಇದೀಗ
ರೊಟ್ಟಿಯ ಮೇಲಿನ ತುಪ್ಪ
ಇದಕೂ ಮೊದಲು ಮಜ್ಜಿಗೆಯೊಳಗಿನ ಬೆಣ್ಣೆ
ಎಲ್ಲದಕೂ ಮುಂಚೆ ಆಕಳ ಕೆಚ್ಚಲ ಖಂಡದೊಳಗಿನ
ರಕ್ತ.
ತೆಪ್ಪಗಿಳಿಯುತ್ತಿದೆ ತುಪ್ಪ
ಅನ್ನನಾಳದಿಕ್ಕೆಲಗಳ ಸವರುತ ತುತ್ತಿನೊಂದಿಗೆ.
ದಿಢೀರ್ ಬಿಕ್ಕಳಿಕೆ:
ಕ್ಷೀರ ಸಂಶೋಧಕ ನೆನೆದನೋ
ಅನ್ನದುತ್ಪಾಕ ಬೈದನೋ-
ನನಗಂತು ನೀರ್ಲೋಟ ನೆನಪಾಯಿತು.
ಅದೇಕೋ
ಅನಾದಿ ಕಾಲದ ಕಿಡಿಯೊಂದು
ಕೆಂಡವಾಗಿ,ನಿಗಿನಿಗಿ
ಜ್ವಾಲೆಯಾಗಿ,ತುಪ್ಪಕಾಗಿ
ಕಾಯುತ್ತಿರುವಂತೆ ಜಠರದುದ್ದಗಲ ನಾಲಿಗೆ ಚಾಚಿ.
ಅದೆಷ್ಟು ಖಂಡುಗ
ಬತ್ತ,ರಾಗಿ ಬೆಂದು ಹೋದವೋ ನನ್ನ ಹೊಟ್ಟೆಯಲ್ಲಿ
ಅದೆಷ್ಟು ಸಮುದ್ರ
ಅದೆಷ್ಟು ಕಾಯಿ ಸೊಪ್ಪು,ಅದೆಷ್ಟು
ಕೊಪ್ಪರಿಗೆ ತುಪ್ಪದೊಡನೆ!
ಎಲಾ
ಹೊಟ್ಟೆಯೇ...
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ