ಸುರಿಯಿತು ಬಿರುಮಳೆ

ಧೋ ಧೋ ಎನ್ನುತ ಸುರಿಯಿತು ಬಿರುಮಳೆ

ತಣ್ಣಗೆ ಮಲಗಿಸಿ ಕೆಂಧೂಳ

ಫಳಫಳ ಮಿಂಚಿನ ಆರತಿ ಎಲ್ಲೆಡೆ

ಢಂ ಢಂ ಗುಡುಗಿನ ಹಿಮ್ಮೇಳ

ಮರಗಿಡ ಬಳ್ಳಿಗೆ ಬೆಟ್ಟ ಕಲ್ಬಂಡೆಗೆ

ಸ್ನಾನ ಮುಗಿಸಿದ ಸಮಾಧಾನ

ಕಪ್ಪೆಯು ಮೆಲ್ಲಗೆ ಹೇಳಿತು ಮೀನಿಗೆ

ಹೊಸ ನೀರಲಿ ಬಾ ಈಜೋಣ

ನೆಲದಾ ಪರದೆಯ ಸರಿಸುತಾ ಬೀಜ

ಇಣಕಿದೆ ಗಗನಕೆ ಮುಖಮಾಡಿ

ಬಾ ಬಾ ಎನ್ನುತ ಬಿಸಿ ಕೈ ಚಾಚಲು

ಸೂರ್ಯನು ಎಡಬಲ ಎಲೆನೀಡಿ

ಹಿತ್ತಿಲಲಿ ಮೈ ಕಾಯಿಸಿಕೊಳುತಿದೆ

ಮಕ್ಕಳ ಮಣ್ಣಿನ ಗಣಪಯ್ಯ

ಕೆಸರಲಿ ತಕ ಥೈ ಎಳೆಪಾದಂಗಳು

ತಾತ ನೋಡದಿರಲಿ ದಮ್ಮಯ್ಯ