ಬದುಕು ಹುಚ್ಚುಹೊಳೆಯು

ಬದುಕು ಹುಚ್ಚು ಹೊಳೆಯು

ಪ್ರೀತಿ ಸುಂದರ ಸುಳಿಯು

ಕನಸುಗಣ್ಣುಗಳಲ್ಲಿ ಉಪ್ಪು ಪನ್ನೀರು.

ಸಾವಿಗೆದುರಿನ ಯಾನ

ರೂಢಿಯಾಗಿಹುದಣ್ಣ

ಅವಳಿದ್ದ ಕಡೆಗಿರಲಿ ನಿತ್ಯ ಹೊಂದೇರು.

ಶವದ ಮೇಲಿನ ಹೂವು

ತರುವ ಪರಿಮಳ ಸೋಕೆ

ಎಂಥ ಮೈಲಿಗೆ ಹೇಳು ರುದ್ರ ಭೈರವಗೆ?

ಬೆಳ್ಳಿ ಬಟ್ಟಲಿನಲ್ಲಿ

ಕಳ್ಳಿ ಹಾಲನು ಕುಡಿಸಿ

ಹೋದ ಪ್ರೇಯಸಿ ಹೊಣೆಯೆ ಬೆಂದ ನನ್ನೆದೆಗೆ?

ನೀರು ಇಂಗದ ವಿನಃ

ತೀರ ಸೇರವು ಸನಿಹ

ಹಣ್ಣಾಗದಿರೆ ಹೆಣ್ಣು ಕಣ್ಣು ತೆರೆಯುವಳೆ?

ನೆತ್ತಿ ಮೇಲಿನ ಸಾಲು

ಉತ್ತರವ ಮರೆತಿರಲು

ಹೂತ ಭಾವನೆಗಳಿಗೆ ಎಲ್ಲಿ ಜೀವಕಳೆ?