ಕಮರಿದ ನಂಟು
ಒಂದು ಸುಂದರ ನಂಟು ಕಮರಿತು ದ್ವೇಷರೋಷದ ಧಗೆಯಲಿ
ಒಂದು ಯಾನವು ನಿಂತುಬಿಟ್ಟಿತು ಸೋತ ಹೆಜ್ಜೆಯ ನೆರಳಲಿ !
ಎಲ್ಲೊ ಸಂಧಿಸಿ ಏನೊ ಬಂಧಿಸಿ ಒಂದುಗೂಡಿದ ಸ್ನೇಹವು
ಹಗೆಯ ಹೊಗೆಯಲಿ ಕಣ್ಣನುಜ್ಜಲು ಕಂಡ ಸಂತಸ ಮಾಯವು !
ಮುನಿದ ಎದೆಯಲಿ ತುಂಬಿ ತುಳುಕಿದೆ ಬಾಚಿ ತಬ್ಬಿದ ಬೇಸರ
ಧಮನಿ ಧಮನಿಯ ಸುತ್ತಿಕೊಂಡಿದೆ ರಕ್ತ ಹೀರುವ ನಾಗರ !
ಮೊದಲ ಭೇಟಿಯೇ ಕಡೆಯ ಭೇಟೀ ಅಷ್ಟೆ ಜೀವಕೆ ಸಾಂತ್ವನ
ಚಿಗುರ ಬೆನ್ನಲೆ ಹಳದಿ ಹಣ್ಣೆಲೆ ಇಷ್ಟೆ ಅಲ್ಲವೆ ಜೀವನ ?
ಒಂದು ಗುಟ್ಟನು ಮುಚ್ಚಲೋಸುಗ ನೂರು ಮಾತಿಗೆ ಕಾರಣ
ಒಂದು ಸುಳ್ಳನು ಸಾಕಿಕೊಳ್ಳಲು ವ್ಯರ್ಥ ಸಲ್ಲದ ಭಾಷಣ !
ಕರಗಿ ಹೋಗುವ ಕ್ಷಣಿಕ ಬಾಳ್ವೆಯು ನಗದೆ ಹೋದರೆ ಸೂತಕ
ತೂಗಿ ಅಳೆವುದೆ ಕೇಳಿ ಪಡೆಯುವ ಪರರ ಹೊಗಳಿಕೆ ಮಾಪಕ ?
ಒಂದು ಸುಂದರ ನಂಟು ಕರಗಿತು ಮಿಂಚಿನಂತೆ ಕ್ಷಣದಲಿ
ಒಂದು ಯಾನವು ಸುಸ್ತುಗೊಂಡಿತು ಹಾದಿ ಮರೆತ ನೆವದಲಿ !
superb sir , mind blowing .............. all d best .........
ಪ್ರತ್ಯುತ್ತರಅಳಿಸಿthank u...
ಪ್ರತ್ಯುತ್ತರಅಳಿಸಿsundaravaagide......:)
ಪ್ರತ್ಯುತ್ತರಅಳಿಸಿ