ನನ್ನ ಹಾಡು ನನ್ನದಲ್ಲ

ಹೆಣ್ಣಿನಿಂದ ಜನ್ಮ ಪಡೆದು

ಮಣ್ಣಿನಿಂದ ಅನ್ನ ಬಗೆದು

ಹೊನ್ನ ಗಳಿಸಿ ತನ್ನ ತೊರೆದು

ಬಣ್ಣದ ಮುಖವಾಡ ತೊಟ್ಟ ಅಣ್ಣಗಳಿರ ಕೇಳಿರಿ

ನನ್ನ ಹಾಡು ನನ್ನದಲ್ಲ ನಿಮ್ಮದೆಂದು ಹಾಡಿರಿ

ಹಡೆದವ್ವ ನಡೆವ ಘಳಿಗೆ

ಹಿಡಿ ಅನ್ನವ ಕೊಡದೆ ಕಡೆಗೆ

ಸುಡುಗಾಡಿನ ಕುಡಿ ದೀಪಗೆ

ವಡೆ ಮಾಡಿ ಎಡೆ ಇಡುವ ತಮ್ಮಗಳಿರ ಕೇಳಿರಿ

ನನ್ನ ಹಾಡು ನನ್ನದಲ್ಲ ನಿಮ್ಮದೆಂದು ಹಾಡಿರಿ

ಬಲ್ಲೆನೆಂಬ ಸುಳ್ಳು ಭ್ರಮೆಯ

ಕಳ್ಳ ಚೇಳು ಹೊಕ್ಕಿ ಹೃದಯ

ಮುಳ್ಳ ಚುಚ್ಚಿ ಕೊಲ್ಲೊ ವಿಷಯ

ಎಳ್ಳಿನಷ್ಟು ತಿಳಿಯದಂಥ ಅಯ್ಯಗಳಿರ ಕೇಳಿರಿ

ನನ್ನ ಹಾಡು ನನ್ನದಲ್ಲ ನಿಮ್ಮದೆಂದು ಹಾಡಿರಿ