ಏಕಾಂತ

ಸೂರ್ಯ ಹೋದ ಚಂದ್ರ ಬಂದ

ನೆನಪು ಕಣ್ಣ ತೆರೆದಿದೆ

ಗೆಳತಿ ನಿನ್ನ ಸನಿಹ ಸಿಗದೆ

ಹೃದಯ ಒಂಟಿಯಾಗಿದೆ

ರೆಪ್ಪೆ ಮುಚ್ಚಿಕೊಂಡರೂನು

ನಿದಿರೆ ವಲಸೆ ಹೋಗಿದೆ

ಕನಸುಗಳನು ಹೆಕ್ಕಿ ತರಲು

ಮನಸು ಹಠವ ಮಾಡಿದೆ

ಅಂದು ನಾನು ನೀನು ಕಳೆದ

ಸಂಜೆ ಮರಳಿ ಕಾಡಿದೆ

ಕಡಲ ತಡಿಯ ಅಲೆಯ ಸ್ಪರ್ಶ

ಇನ್ನು ಹಾಗೆ ಉಳಿದಿದೆ

ಇರುಳ ಮುಗಿಲ ಹೆರಳಿನಲ್ಲಿ

ನಿನ್ನ ಬೈತಲೆ ಇದೆ

ಕೊರೆವ ಚಳಿಯ ತಂಪಿನ ಕ್ಷಣ

ಮಡಿಲ ಬಿಸಿಯು ಬೇಕಿದೆ

ನಸುಕು ಇಣಕುತಿರಲು ನನ್ನ

ನಿಶೆಯು ಕಳೆದು ಹೋಗಿದೆ

ಹುಡುಗಿ ನೀನು ಇರುವ ಕಡೆಯೆ

ಹೊಸತು ಹಗಲು ಜನಿಸಿದೆ